'बाटोमुनिको फूल' - नया नेपाली चलचित्र समीक्षा

गायकद्वय यशकुमार र बाबु बोगटी अभिनित  चलचित्र 'बाटोमुनिको फूल' आज शुक्रबारबाट देशव्यापी रिलिज  भयो । रिलिज अघि यस चलचित्रको बुधबार बेलुका राजधानीको जय नेपाल चलचित्र घरमा प्रिमियर शो गरिएको थियो । प्रिमियर शो मा नेपाली सिनेकर्मी र सञ्चारकर्मीबाट राम्रो प्रतिक्रिया पाएको निर्देशक सुरज सुब्बा 'नाल्बो'ले बताए ।  'नेपाली सिनेमा उद्योगमा निर्देशक र लेखकका रूपमा दुई दशक काम गरेको अनुभवका आधारमा मैले यो चलचित्र बनाएको हुँ । जसलाई राम्रो बनाउन मैले निकै मेहनत गरेको छु,' सुब्बाले भने । यसअघि चलचित्र अंशबन्डा र हाउडेको निर्देशन गरेका सुब्बाको यो तेस्रो फिल्म हो । यस वर्षै सबैभन्दा महँगो भनिएको यो चलचित्रको लगानी एक करोड १० लाखभन्दा बढी रहेको निर्माण पक्षको दाबी छ ।
यो वर्ष बनेका चलचित्रहरु मध्ये आफ्नो फिल्म सबैभन्दा राम्रो भएको प्रतिक्रिया आफूले पाएको पनि उनले बताए, 'सबैबाट राम्रो चलचित्र बनेको प्रतिक्रिया पाइरहेको छु । दर्शकबाट पनि यस्तै प्रतिक्रिया पाउने विश्वासमा छु,' उनले भने ।
बाटोमुनिको फूल देवतालाई चढाउनुहुन्न भन्ने मान्यता छ । बाटोमुनि र बाटोमाथि दुवै ठाउँको फूल उस्तै भए पनि बाटोमुनिको फूललाई पूजाका लागि आयोग्य मानिन्छ । यही प्रसंगलाई यो चलचित्रको कथामा बुनिएको छ । दलितलाई बाटोमुनिको फूल सरी समाजका उपल्ला जातले हेर्ने गरेको प्रसंग यो फिल्ममा उठाइएको छ ।
बाटोमुनिको फूलको निर्माण गायक बाबु बोगटी, यशकुमार र राजेश घतानीले  गरेका हुन् । यसको कथा यशकुमारको हो । निर्देशक सुब्बाको अनुसार मुलुकको अन्तरिम संविधानले छुवाछूतको अन्त्य गरे पनि समाजमा अझै छुवाछूत र भेदभाव जारी रहेको पनि यो सिनेमाका उल्लेख छ ।
सुन्दर प्रेमकथामा आधारित यो चलचित्रमा बाबु बोगटी र यशकुमार नायकका रूपमा प्रस्तुत भएका छन् । नायिकामा भने रेखा थापा र नन्दिता केसी छन् ।